Sunday, 5 February 2023

കാപ്പിയും വെള്ളവും

ടറെക് എൽതയ്യെബ് (1959)

ദിവസം ഒരു നൂറുതവണയെങ്കിലും
അവൻ പറയുന്നു: "എനിക്ക് മടങ്ങിപ്പോകണം.
ഇവിടെ ഒരു ദയയുമില്ല. അവിടെ, അവിടെയെത്ര
അനുഗ്രഹീതവും ദയയുള്ളതുമൊക്കെയാണ്..."
പിന്നെ അവൻ മിണ്ടാതെയിരിക്കും.

ഞാൻ അവനോട് ചോദിക്കും:
"അവിടെ? അവിടെയെന്നാൽ എവിടെ?"
അവൻ എവിടേക്കോ വിരൽചൂണ്ടും,
മുഖത്ത് ഒരു ഭാവവ്യത്യാസവും ഉണ്ടാകില്ല,
പിന്നെയവൻ ഒട്ടും മിണ്ടാതെയാകും.

ഞാൻ അവൻ്റെ കൈപ്പിടിച്ചുകൊണ്ട്
ഒരു കഫേയിലെ ഒഴിഞ്ഞ മൂലയിലുള്ള
മേശയ്ക്കരികിൽ ചെന്നിരുന്നു;
അവനു കാപ്പി ഓർഡർ ചെയ്തു
എനിക്ക് വെള്ളവും.

അവനോട് അറബിയിൽ സംസാരിച്ചുകൊണ്ട്
കാപ്പിയിൽ ഞാൻ വെള്ളം ചേർത്തിളക്കി.
വെറിപിടിച്ചുകൊണ്ട് അവൻ പറഞ്ഞു:
"നിങ്ങൾക്കെന്താ വട്ടാണോ?"

അവൻ കാപ്പിയിൽ നിന്നും
വെള്ളം തിരിച്ചെടുക്കാൻ
ശ്രമിച്ചുകൊണ്ടിരുന്നു.

അവൻ ശ്രമിച്ചുകൊണ്ടേയിരുന്നു

വെള്ളത്തെ 
വെള്ളത്തിലേക്കുതന്നെ 
തിരിച്ചെടുക്കാൻ.

"Coffee and Water" by Tarek Eltayeb

തെളിച്ചമുള്ള സംസാരം

ടറെക് എൽതയ്യെബ് (1959)

ഭക്ഷണശാലകളിലും കഫേകളിലും
കാര്യങ്ങൾക്കെല്ലാം അൽപ്പായുസ്സേയുള്ളൂ.

ഒരു ഗ്ലാസ്സ് വീഴുന്നു,
പൊട്ടുന്നു,
വിളമ്പുകാരി ക്ഷമ ചോദിക്കുന്നു.
ഒരു ഗ്ലാസ്സ് ഇല്ലാതെയാകുന്നു,
മറ്റൊന്ന് ഇതിനോടകം തയ്യാറാകുന്നു.

ഒരു ഗ്ലാസ്സ് വീണുടയുന്നു,
ഒരു സംഭാഷണം മുറിയുന്നു,
വിളമ്പുകാരി ക്ഷമ ചോദിക്കുന്നു.
ഒരു സംഭാഷണം ഇല്ലാതെയാകുന്നു,
മറ്റൊരു സംഭാഷണത്തിന് തുടക്കമാകുന്നു.

"The Transparent Conversation" by Tarek Eltayeb

Saturday, 4 February 2023

അയോദ്ധ്യ

വാൽമീകി / വിവേക് നാരായണൻ

അയോദ്ധ്യയിൽ നിര്‍ധനർ ആരുമില്ല
അയോദ്ധ്യയിൽ അസന്തുഷ്ടർ ആരുമില്ല
അയോദ്ധ്യയിൽ വിശക്കുന്ന ആരുമില്ല
അയോദ്ധ്യയിൽ മോഷണത്തിനിരയായ ആരുമില്ല
അയോദ്ധ്യയിൽ മർദ്ധനമേൽക്കുന്ന ആരുമില്ല
അയോദ്ധ്യയിൽ നിരക്ഷരർ ആരുമില്ല
അയോദ്ധ്യയിൽ നിരീശ്വരവാദിയായ ആരുമില്ല
അയോദ്ധ്യയിൽ ക്രൂരരോ പിശുക്കരോ ആയ ആരുമില്ല
അയോദ്ധ്യയിൽ അടിമയായ ആരുമില്ല
അയോദ്ധ്യയിൽ രോഗിയായ ആരുമില്ല
അയോദ്ധ്യയിൽ വൃദ്ധരോ മുടന്തരോ ആയ ആരുമില്ല
അയോദ്ധ്യയിൽ            ആരുമില്ല

After Valmiki’s Ramayana: Bālakanda, sarga 6 by Vivek Narayanan

പ്രേമബന്ധം

റസ്സൽ എഡ്സൺ (1935-2014)

ഒരു നാൾ ഒരാൾ അയാളുമായിത്തന്നെ പ്രേമത്തിലായി, തന്നെക്കുറിച്ചല്ലാതെ മറ്റൊന്നിനെപ്പറ്റിയും ചിന്തിക്കാൻ ആകാതെയായി. അയാൾ അതിൽത്തന്നെ സ്വയംമറന്നു മുഴുകി, ഒരാളും അയാളിൽ ഇത്രത്തോളം താല്പര്യം ഇന്നേവരെ കാണിച്ചിരുന്നില്ല...

അയാൾക്ക് തന്നെക്കുറിച്ചുതന്നെ എല്ലാം അറിയണമെന്നായി, ഇഷ്ടമുള്ള പ്രവർത്തികൾ, ഇഷ്ടമുള്ള സംഗീതം, കളികൾ അങ്ങനെയെല്ലാം. കുഞ്ഞുനാളിൽത്തന്നെ തന്നെ തനിക്ക് അറിയാൻ ആകാതെപോയല്ലോ എന്നോർത്ത് അയാൾക്ക് കുശുമ്പായി. എങ്ങനെയുള്ള ആൺകുട്ടിയായിരുന്നു താനെന്ന് അറിയാൻ തോന്നി...

വിവാഹത്തിലേക്ക് കടക്കാൻ ആലോചനയുണ്ടോയെന്ന് ചോദിച്ചപ്പോൾ അയാൾ പറഞ്ഞു, താൻ ഏറ്റവും കൂടുതൽ ആഗ്രഹിക്കുന്ന കാര്യമാണ് അതെന്ന്, തനിക്ക് തന്നിൽത്തന്നെ കുഞ്ഞുങ്ങളുണ്ടാകുകയെന്നത് എറ്റവും കൊതിക്കുന്ന കാര്യമാണെന്ന്.

"The Love Affair" by Russel Edson from The Tunnel: Selected Poems

ഏകാന്ത യാത്രികൻ

റസ്സൽ എഡ്സൺ (1935-2014)

അയാളൊരു ഏകാന്ത യാത്രികനാണ്, വഴിയിൽ വെച്ചാണ് കൂട്ടാളിയെ കണ്ടെത്തുന്നത്; ഒരേ വഴിക്കാണ് ഇരുവരും പോകുന്നതെങ്കിൽ, ആരെയെങ്കിലും കണ്ടുമുട്ടാനായേക്കുമെന്നു മാത്രം.

... വഴിയുടെ അറ്റത്ത് ഇതിനോടകം എത്തിയിരിക്കുന്നത് ആ വഴി മാത്രമാണ്; നീളമേറെയുള്ള ഒരു പാമ്പിനെപ്പോലെ, അങ്ങ് ദൂരെ അതിന്റെ കണ്ണുകളടച്ച്, അത് ഉറക്കത്തിലാണ്...

"The Lonely Traveler" by Russel Edson from The Tunnel: Selected Poems